විප්ලවීය ආචාරය

බැටන් පොළු
බූට් අඩි
හත අටක් 
කා ගෙනම
සිරිල් අයියා ගියේ
බැරියරුත් පෙරළගෙන
කඳුළු ගෑසුත් වැදී
ඇස් කෙවෙණි
රිදෙනකොට
සිරිල් අයියා හෙව්වෙ
ගඩොලකුයි ගහන්නට
විප්ලවේ ගැන කියපු
කතා ගැන ඇහෙනකොට
සිරිල් අයියා හිටියෙ
සුරලොවක් දකින්නට
රතු ඇඳලා
රැවුල වැව්
සහෝදරු දකිනකොට
පපුව පුම්බන් සිරිල්
ගියේ ඉස්සරහටම
අහක යන උණ්ඩයක්
පපුවටම වැදුනාම
සිරිල් අයියා වැටුණෙ
බැනරයක් පෙරලාන
සිරිල්වත් පාගගෙන
සහෝදරු දුවනකොට
ඔච්චමට හිනාඋනෙ
ඉර ඉඳන් අහස මැද
පොඩි එකයි කාන්තිය
මිනිය ළඟ අඩනකොට
බැනරයක් එල්ලුනා
ගෙට හැරෙන දෙවැට ළඟ
පාගගෙන දුවපු උන්
රැවුල ඇද ඇද ජයට
කෑ ගැහුවා සිරිල්ගේ
නොමැරෙනා මතක ගැන
ආපු උන් ඔක්කොමලා 
හැන්දෑවෙ ගිය පසුව
පොඩි එකයි කාන්තියි
තනි උනා අඳුර මැද
ලණු කැඩුණු බැනරයේ
අකුරු එහෙ මෙහෙ වැනෙන
තිබුණා අවසන් කියුම

‘විප්ලවීය ජීව ගුණය රැකගෙන
අධිපතිවාදී වෙඩි උණ්ඩයට දිවි දුන්
සිරිල් සහෝදරයාට
අපේ විප්ලවීය ආචාරය’