පේමෝතිගෙ ළමයි

උදයෙන්ම නැගිට
ලිප මුල්ලෙ පෙළට
වාඩි වී ඉන්න
තේ ඩිංග බොන්න
ඊට පස්සේ ගිහිං
මූණ කට දොවන
උං
පේමෝතිගෙ ළමයි

ආප්පත් රැගෙන
කඩපිලට දුවන
දුවන්නට කළිං
අම්මටත් වඳින
අනිත් උන්ටත් කළිං
ඉස්කෝලෙ දුවන
උං
පේමෝතීගෙ ළමයි

ඉගෙනුමට දක්‍ෂ
දුවන්නත් දක්‍ෂ
වොලිබෝල් ගහන
ගුරුවරුන් කැමති
හැබැයි
ලොකු ටීච බනින
උං
පේමෝතිගෙ ළමයි

ලොකු එකා දොළහෙ
පොඩි එකා හතරෙ
දෙවනියා දහයෙ
කෙල්ල නම් නවයෙ
උංට උන් කිට්ටු
ආදරෙන් වැඩුණු
උං
පේමෝතිගෙ ළමයි

ලොකු එකා සමන්
මහත්තැන් කෙනෙක්ගෙලු
දෙවනියා පියල්
කඩේ මුදලාලිගෙලු
කාන්තිගෙ හැඩේ
ලොකු ටීචගෙ දුවගෙමලු
පොඩි එකා නං ඉතිං
පියරත්නයා ගෙමලු
ඒත් උං
පේමෝතිගෙ ළමයි

වැලට බර නැතිව
හරි හොඳට හැදෙන
කතන්දර අහං
ඒවාට අඩන
ඒ අඩන ගමං
හයියටත් හිතන
උං
පේමෝතිගෙ ළමයි